އެއްވެސް އިރެއްގައި ލޭނުގެ އަދަދު ބަދަލުވެފައެއް ނެތް އަޅުގަނޑާ ހާވާލުވިއިރު ބްރިޖް މަޝްރޫޢު ގެންދަން ނިންމާފައި އޮތްވަރަށް މަޝްރޫޢު ފުރިހަމަ ކުރީ – ރައީސް

ޗައިނާ މޯލްޑިވްސް ފްރެންޑްޝިޕް ބްރިޖް "ސިނަމާލެ ބްރިޖް"ގެ އެއްވެސް ލޭންއެއް މަދުނުވާނެކަމަށާއި އެ މަޝްރޫޢު ފުރިހަމަކޮށް ނިންމާލީ ހައުސިންގ މިނިސްޓްރީއާއި މަޝްރޫއު ހަވާލުކުރި އިރު އޮތް ޑިޒައިންއާއި އެއްގޮތަށް ކަމުގައި ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ. އަދި ބްރިޖު ހަނިވުމުގެ ބަދަލުގައި ހެވީ ވެހިކަލްތައް ބޭނުންކުރާ ލޭނުތައް އިތުރަށް ފުޅާކުރުމަށްޓަކައި 1 މީޓަރު ފުޅާވެގެން ދިޔަކަން އެ މަނިކުފާނު ވިދާޅުވިއެވެ. އެމަނިކުފާނު މިހެން ވިދާޅުވީ ސަންގު ޓީވީއަށް ދެއްވި ޚާއްޞަ ބަސްދީގަތުމެއްގައެވެ.

މި ބަސްދީގަތުމުގައި ވާހަކަފުޅުދައްކަވަމުން ރައީސް ވިދާޅުވީ އެމަނިކުފާނު ކުރައްވާ ކޮންމެ މަސައްކަތެއްވެސް ވަރަށް ޝައުޤުވެރިކަމާއެކު އެންމެ ރަނގަޅު ނަތީޖާ ނެރެދެއްވުމަށް މަސައްކަތް ކުރައްވާ ކަމުގައެވެ. އެކަމުގެ ނަތީޖާއެއްގެ ގޮތުން ބްރިޖްގެ މަޝްރޫޢުވެސް ނިންމަން ކަނޑައަޅާފައިވާ ތާރީޚަށްވުރެ 2 މަސްދުވަސް ކުރިން ނިންމާލެވުނުކަމުގައި އެމަނިކުފާނު ފާހަގަކުރެއްވިއެވެ.

ބްރިޖްގެ މަސައްކަތާ ހަވާލުވީފަހުން ރައީސް މަސައްކަތްކުރެއްވި ގޮތް މި ބަސްދީގަތުމުގައި ވަރަށް ތަފުޞީލުކޮށް ޙިއްޞާކުރައްވާފައިވެއެވެ. އެގޮތުން ބްރިޖުގެ މަސައްކަތުގައި އަމަލީ ގޮތުން ބައިވެރިވުމާއި ޤަވާއިދުން އެ މަޝްރޫޢު ކުރިއަށް ދާގޮތް ބެއްލެވިކަމުގައި އެމަނިކުފާނު ފާހަގަކުރެއްވިއެވެ. މީގެ އިތުރުންވެސް ރައްޔިތުންނަށް ބްރިޖުން އެންމެ ފުހިހަމަ ގޮތެއްގައި ފައިދާ ހޯދައިދިނުމަށް މަސައްކަތްޕުޅު ކުރެއްވިކަމަށާއި މި ބްރިޖް ތަރައްޤީކުރުމަށް ކަނޑައަޅާފައިވާ ޝެޑިއުލާއި ބަޖެޓާ އެއްވަރަށް ގެންދެވޭނެ އެންމެ ފުރިހަމައަށް މި މަޝްރޫޢު ގެންދިއުމަށް މަސައްކަތްޕުޅު ކުރެއްވިކަމުގައި ރައީސް ވިދާޅުވިއެވެ.

"އެކި ހައިސިއްޔަތުން މިނިސްޓަރެއްގެ ހައިސިއްޔަތުން ޒިންމާ އަދާކުރާ މީހާގެ ހައިސިއްޔަތުން ކުރަންޖެހޭ މަސައްކަތްތަކާއި އަދި ޓެކްނިކަލީ ބައެއްފަހަރު ދެކެވޭ ވާހަކައިގެ ތެރޭގައިވެސް އަޅުގަނޑު ބައިވެރިވިން. އެހެންވީމަ ވަރަށް އިންޑެޕްތްކޮށް ވަރަށް ތަފްޞީލުކޮށް ވަރަށް ބޮޑަށް މަސައްކަތުގައި އުޅެވުނު" ކަމުގައި ރައީސް ވިދާޅުވިއެވެ. އެގޮތުން ދެހަފްތާއިން އެއްހަފުތާ ޕްރޮޖެކްޓް ސައިޓް މޭނޭޖަރ އާއި ވާހަކަދައްކައި އެންމެ ފަހުގެ މަޢުލޫމާތު ހޯއްދެވިކަމަށާއި މަހަކު 1 ފަހަރު ބްރިޖްގެ އަމަލީ މަސައްކަތް ދާ ގޮތް ބައްލަވާލައްވަން ވަޑައިގެންނެވިކަމުގައިވެސް އެމަނިކުފާނު ވިދާޅުވިއެވެ. އަދި ޗައިނާއަށްވެސް 3 ފަހަރު މަޝްރޫއުގެ ކަންކަމާ ގުޅޭ މަސައްކަތް ކުރުމަށް އެ ޤައުމަށް ވަޑައިގެންނެވިކަމުގައި އެމަނިކުފާނު ފާހަގަކުރެއްވިއެވެ.