މި ސަރުކާރުން އިޤްތިޞާދު ރަނގަޅުކުރުމަށްޓަކައި އަޅާފައިވާ ހަރުދަނާ ބިންގާގެމަތީގައި ޤައުމަށް ކުރިއެރުން ހާސިލްވާނެ
-
އިޤްތިޞާދު ހަރުދަނާ ކުރުމަށް ބިންގާއެއްގެ ގޮތުން، ފައިސާ އިތުރަށް ޗާޕުނުކުރުމާއި، ޑޮލަރު އިތުރުކުރުމަށްވެސް ހަރުދަނާ ފިޔަވަޅުތަކެއްއަޅައި ސަރުކާރުން ކުރަމުންދާ މަސައްކަތުގެ ނަތީޖާއެއްގެ ގޮތުން ކުރިއަށް އޮތް ދުވަސްތަކުގައި އިޤްތިޞާދު ކުރިއަރާނެކަމުގައި ރައީސް ޑރ މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ސަންގު ޓީވިއަށް ދެއްވި ޚާއްޞަ ބަސްތީގަތުމެއްގައި ވާހަކަފުޅު ދައްކަވަމުންނެވެ.
ރައީސްގެ ވާހަކަފުޅުގައި ސަރުކާރުން އިޤްތިޞާދު ހަރުދަނާ ކުރުމަށް އަޅާ ފިޔަވަޅުތަކުގެ ނަތިޖާއެއްގެ އޮތުން މުސްތަޤްބަލުގައި ޤައުމުގެ ރިޒާވްވެސް ރަނގަޅުވާނެކަމުގައި ފާހަގަކުރައްވާފައިވެއެވެ. އަދި ސަރުކާރުން ދައްކަން ހުރި ފައިސާ މިހާރުވެސް ދައްކަމުންދާކަމުގައި ފާހަގަކުރައްވައި ސަރުކާރުގެ އަމާޒަކީ ނޮވެންބަރުމަސް ނިމެންވާއިރަށް މިހާރު ނުދެއްކި 'ޕެންޑިންގ' ގައިހުރި ފައިސާތައް މީހުންނަށް ދީ ނިންމުންކަމުގައި އެމަނިކުފާނު ވިދާޅުވިއެވެ.
މިހާރު ސަރުކާރުން އިޤްތިޞާދު ރަނގަޅުކުރުމަށް ކުރަމުންއަންނަ މަސައްކަތްތަކުގެ މައްޗަށް އަލިއަޅުވާލައްވަމުން އެމަނިކުފާނު ވިދާޅުވީ އެއާޕޯޓް ނިމެމުން އަންނަކަމަށާއި، ރިސޯޓްތައް ހުޅުވެމުންދާކަމަށާއި، މަސްވެރިކަމުގެ ސިނާޢާތްވެސް ފުޅާކުރުމަށް އިތުރު ފެކްޓްރީ ތައްވެސް ހެދޭނެކަމުގައެވެ. އަދި މީގެ އިތުރުންވެސް ބޮޑެތި މަޝްރޫޢުތައް ފެށިގެން ދާކަމުގައިވެސް އެމަނިކުފާނު ވިދާޅުވިއެވެ.
ރައީސް ޑރ މުޢިއްޒުގެ ވާހަކަފުޅުގައި އެމަނިކުފާނު ވިދާޅުވީ މި ސަރުކާރުގެ ހަރުދަނާ ޚާރިޖީ ސިޔާސަތުގެ ދަށުން ޤައުމުގެ އިޤްތިޞާދު ހަރުދަނާކުރުމަށް ބޭރު ޤައުމުތަކުގެ އެހީތެރިކަންވެސް ލިބެމުންދާކަމުގައެވެ. އެގޮތުން މާލޭގެ މަގުތައް ޗައިނާ ސަރުކާރުގެ ހިލޭ އެހީގެ ދަށުން ހެދުމަށް ބޮޑު މަޝްރޫޢެއް ތައްޔާރުވެފައިވާކަމުގައި ފާހަގަކުރެއްވިއެވެ.
ރައީސް ސަންގު ޓީވީއަށް ދެއްވި ބަސްދީގަތުން ނިންމަވާލައްވަމުން ވިދާޅުވީ ކުރިއަށްއޮތް މުސްތަޤްބަލުގައި މެދު ރާސްތާ އަދި ދުރުރާސްތާއަށް ދެމެހެއްޓިނިވި ކުރިއެރުމެއް ދިވެހިން ދެކޭތަން އިރާދަކުރެއްވިއްޔާ ފެންނާނެކަމުގައެވެ.