ދިވެހިރާއްޖެއާ އިންޑޮނޭޝިއާ އާއި ދެމެދު ސިޔާސީ ގުޅުން ގާއިމުކުރިތާ 50 އަހަރު ފުރޭ މުނާސަބަތުގެ ހެޔޮއެދުންތައް ރައީސް ފޮނުއްވައިފި

ރައީސް ޑރ މުޙައްމަދު މުޢިއްޒު، ދިވެހިރާއްޖެއާ އިންޑޮނޭޝިއާ އާއި ދެމެދު ސިޔާސީ ގުޅުން ގާއިމުކުރިތާ 50 އަހަރު ފުރޭ މުނާސަބަތުގެ ތަހުނިޔާއާއި ހެޔޮއެދުންތައް އިންޑޮނޭޝިއާގެ ރައީސް ޖޯކޯ ވިޑޯޑޯއަށް ފޮނުއްވައިފިއެވެ.

އިންޑޮނޭޝިއާގެ ރައީސަށް ތަހުނިޔާ ވިދާޅުވެ ރައީސް ފޮނުއްވި ސިޓީފުޅުގައި އެމަނިކުފާނު ވަނީ ދެޤައުމުގެ ދެމެދުގައި އޮތް ތާރީޚީ ގުޅުން ފާހަގަކުރައްވައި މި މުނާސަބަތުގެ ހެޔޮއެދުންތައް އިންޑޮނޭޝިއާގެ ސަރުކާރާއި ރައްޔިތުންނަށް ފޮނުއްވާފައެވެ. ރައީސް ވަނީ ދެ ޤައުމުގެ ދެމެދުގައި އޮތް ގާތް ރަހުމަތްތެރި ގުޅުންތައް ވޭތުވެދިޔަ އަހަރުތަކުގައި އިތުރަށް ކުރިއަރައި ގޮސްފައިވާކަން ފާހަގަކުރައްވާފައެވެ.

ރައީސްގެ ސިޓީފުޅުގައި އިންޑޮނޭޝިއާގެ ރައީސާއި އެޤައުމުގެ ސަރުކާރާއި އެކުގައި މަސައްކަތްކުރައްވައި، ދެޤައުމުގެ ރައްޔިތުންނަށް ފައިދާހުރި ކަންކަމުގައި ގުޅިގެން މަސައްކަތްކުރައްވަމުން ގެންދެވުމަށާއި ދެޤައުމުގެ ދެމެދުގައި އޮންނަ ގާތް ރަހުމަތްތެރި ގުޅުންތައް އިތުރަށް ބަދަހިކުރެއްވުމަށް އުންމީދުކުރައްވާ ކަމުގައި ވިދާޅުވެފައިވެއެވެ.

ރައީސް ވަނީ އިންޑޮނޭޝިއާގެ ރައީސަށް ފުރިހަމަ ޞިއްޙަތާއި ދުޅަހެޔޮކަމަށް އެދިވަޑައިގެން، އަދި އެ އެޤައުމުގެ ރައްޔިތުންނަށް ކުރިއެރުމާއި ފާގަތިކަމަށް އެދިވަޑައިގަންނަވާފައެވެ.