"މަތީ އަރުތަވެރިންގެ އިނާމު 2022-2023" ދިނުމުގެ ރަސްމިއްޔާތުގެ ތިންވަނަ ދަންފަޅި ރައީސް ޝަރަފުވެރި ކޮށްދެއްވައިފި
2022 – 2023 ވަނަ އަހަރުގެ "މަތީ އަރުތަވެރިންގެ އިނާމު" ދިނުމުގެ ރަސްމިއްޔާތުގެ ތިންވަނަ ދަންފަޅީގެ ތެރެއިން
2022 – 2023 ވަނަ އަހަރުގެ "މަތީ އަރުތަވެރިންގެ އިނާމު" ދިނުމުގެ ރަސްމިއްޔާތުގެ ތިންވަނަ ދަންފަޅި ރައީސް ޑރ. މުޙައްމަދު މުޢިއްޒު ޝަރަފުވެރި ކޮށްދެއްވައިފިއެވެ. މި ރަސްމިއްޔާތު އޮތީ މިރޭ ދަރުބާރުގެ ރަންނަ ބަނޑޭރި މާލަމުގައެވެ.
މި ރަސްމިއްޔާތުގައި ރައީސް އަރިހުގައި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު ބައިވެރިވެވަޑައިގެންނެވިއެވެ.
މި ރަސްމިއްޔާތުގައި، ރައީސް ވަނީ މަތީ ޘާނަވީ ތަޢުލީމު ނިންމާ އިމްތިހާނުތަކުން މުޅި ދުނިޔެއިން 1 ވަނަ އަދި ޤައުމީ ގަދަ 10ގެ 1 ވަނަ ނަތީޖާ ހޯދި ދަރިވަރުންނަށް ޓްރޮފީ އާއި ހަނދާނީ ލިޔުން ހަވާލުކޮށްދެއްވާފައެވެ.
2022 – 2023 ވަނަ އަހަރުގެ "މަތީ އަރުތަވެރިންގެ އިނާމު" ދިނުމުގެ ރަސްމިއްޔާތު މިއަހަރު ކުރިޔަށް ގެންދަނީ ތިން ދަންފަޅިއަކަށް ބަހާލައިގެންނެވެ. މަތީ ޘާނަވީ ތަޢުލީމު ނިންމާ އިމްތިހާނުތަކުން މިދިޔަ އަހަރުގެ އެންމެ ރަނގަޅު ނަތީޖާ ހޯދައިގެން ޤައުމީ ގަދަ 10 ގައި 376 ދަރިވަރުން ހިމެނިފައިވެއެވެ. އަދި ޘާނަވީ އިމްތިހާނުތަކުން ދުނިޔޭގެ ފެންވަރުގައި މަތީ ވަނަ ހޯދި ދަރިވަރުންނާއެކު ޖުމްލަ 441 ދަރިވަރުންނަށް މި ރަސްމިއްޔާތުގެ އެކި ދަންފަޅިތަކުގައި އިނާމު ލިބޭނެއެވެ.
އެހެން އަހަރުތަކާ ޚިލާފަށް މިއަހަރުގެ މި ރަސްމިއްޔާތު ބޭއްވިގެން މިދަނީ ދަޢުލަތުން ޚަރަދުކޮށްގެންނެވެ. އަދި މިއަހަރު އިނާމް ދިނުމުގެ ރަސްމިއްޔާތު 3 ދަންފަޅިއަކަށް ބަހާލައިގެން ކުރިއަށްގެންދިޔަ އިރު 3 ދަންފަޅިވެސް ޝަރަފުވެރިކޮށްދެއްވީ ރައީސް ޑރ މުޙައްމަދު މުޢިއްޒެވެ. މިއީ ރާއްޖޭގެ ރައީސްއަކު މިގޮތަށް ޖަލްސާއެއް ޝަރަފުވެރިކޮށްދޭ ފުރަތަމަ ރަސްމިއްޔާތެވެ.
ޒުވާނުން ބިނާކުރުމާއި ރާއްޖޭގެ ތަޢުލީމީ ދާއިރާ ތަރައްޤީކޮށް ހަރުދަނާކުރުމަކީ ރައީސް ޑރ މުޙައްމަދު މުޢިއްޒުގެ ހަރުދަނާ ސަޔާސަތުތަކުގެ ތެރޭގައި ހިމެނޭ މުހިންމު އެއް ސިޔާސަތެވެ. އަދި އެމަނިކުފާނު އެތައް ޕޯޑިއަމްއެއްގައި ކިޔަވާކުދިންނަށް ހިތްވަރު ދެއްވާ ވަރުގަދަ އަޒުމެއްގައި ގަދައަޅައި މަސައްކަތްކޮށް ކާމިޔާބީއާ ހަމައަށް ވާސިލްވުމަށް ނަޞޭހަތްތެރިވެލައްވާފައިވެއެވެ. މީގެ އިތުރުންވެސް ރާއްޖޭން ބޭރުންވެސް ކިޔަވާ ކުދިންނަށް ފުރުޞަތުތައް ފަހިކޮށްދީ ކިޔަވާ ދިނުމާއި, ތަޢުލީމީ ދާއިރާގެ ވަޞީލަތްތައް ޤާއިމުކުރުމަށް ނުހަނު އަހަންމިއްޔަތުކަމެއް ދެއްވައިގެން މަސައްކަތްތަކެއް ދަނީ ކުރައްވަމުންނެވެ.