ޗައިނާ އާއި ރާއްޖެއާ ދެމެދު އޮތް ގުޅުން ބިނާވެފައިވަނީ އިތުބާރާއި، އިޙްތިރާމާއި، ސިޔާދަތު ދެމެހެއްޓުމާއެކު، އިސްތިޤުލާލު ހިފެހެއްޓުމުގެ ބިންގަލުގެ މަތީގައި
-
ޗައިނާ އާއި ރާއްޖެއާ ދެމެދު އޮތް ގުޅުން ބިނާވެފައިވަނީ އިތުބާރާއި، އިޙްތިރާމާއި، ސިޔާދަތު ދެމެހެއްޓުމާއެކު، އިސްތިޤުލާލު ހިފެހެއްޓުމުގެ ބިންގަލުގެ މަތީގައިކަމުގައި ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޗައިނާގެ 75 ވަނަ ޤައުމީ ދުވަހުގެ މުނާސަބަތުގައި ބޭއްވި ރިސެޕްޝަނުގައި ވާހަކަފުޅުދައްކަވަމުންނެވެ.
ރައީސްގެ ވާހަކަފުޅު މި މޭރުމުން ކުރިއަށް ގެންދަވަމުން ރާއްޖެއާ ޗައިނާ ކުރިއަށް އޮތް ތަނުގައި، ވިޔަފާރި އާއި، ފަތުރުވެރިކަމާއި، ދަނޑުވެރިކަމާއި، މަސްވެރިކަމާއި، އިއާދަކުރަނިވި ހަކަތަ އާއި، ބޯހިޔާވަހިކަމާއި ބިނާރު އަދި ޘަޤާފީ ދާއިރާގައި މިހާރަށްވުރެ ގުޅުން ބަދަހިވުމަށް އެމަނިކުފާނު ކުރައްވާ ތަޞައްވުރު ޙިއްސާކުރައްވާފައިވެއެވެ. އަދި އެމަނިކުފާނު ވިދާޅުވީ، ރާއްޖޭގެ އިޖުތިމާއީ އަދި އިގުތިސާދީ ކުރިއެރުމުގައި ޗައިނާގެ ދައުރު ވަރަށް ބޮޑު ކަމަށާއި ކުރިމަގުގައި ވެސް އެ ގުޅުން އިތުރަށް ވަރުގަދަ ވާނެ ކަމަށެވެ.
ރައީސްގެ ވާހަކަފުޅުގައި އެމަނިކުފާނު ވަނީ ބައިނަލްއަގްވާމީ މައިދާނުގައި އިގްތިސާދީ ގޮތުން ޗައިނާ އަދާކުރާ މުހިންމު ދައުރުގެ މައްޗަށް ވެސް އަލިއަޅުއްވާ ލައްވާފައެވެ. އެގޮތުން ފާއިތުވި އަހަރުތަކުގައި އެ ގައުމުން ހޯދާފައިވާ ޒަމާނީ ކުރިއެރުންތަކަށް އެމަނިކުފާނު ވަނީ މަރުހަބާ ވިދާޅުވެފައެވެ. އަދި އެމަނިކުފާނު ވަނީ ދުނިޔޭގެ ވަރުގަދަ ބާރުތަކުގެ ތެރޭގައި މިއަދު ޗައިނާ ހިމެނިގެން ގޮސްފައިވަނީ ވިލުންތެރިކަމާއި، ޒަމާނީ ވިސްނުމުގެ ސަބަބުން ކަމުގައި ވިދާޅުވެފައެވެ.
ރައީސްގެ ވާހަކަފުޅު ނިންމަވާލެއްވީ މޫސުމަށް އަންނަ ބަދަލުތަކާއި ދެމެހެއްޓެނިވި ތަރައްގީ ފަދަ ދުނިޔެއަށް ކުރިމަތިވެފައިވާ ގޮންޖެހުންތަކާ ކުރިމަތިލުމަށް ގުޅިގެން މަސައްކަތްކުރުމުގެ މުހިންމުކަން ފާހަގަކުރައްވައި، ކުރިއަށް އޮތްތަނުގައި ވެސް ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިވެގެންދާނެ ކަމަށް އުންމީދު ކުރައްވަމުންނެވެ.