އަޅުގަނޑުގެ ޚާރިޖީ ސިޔާސަތު ބައްޓަން ކުރުމުގައި އަދި ހިންގުމުގައި އަބަދުވެސް އެންމެ އިސްކަން ދޭނީ ދިވެހިރައްޔިތުންގެ މަސްލަޙަތު ޙިމާޔަތްކުރުމަށް– ރައީސް ޑރ މުޢިއްޒު

މި ސަރުކާރުގެ ޚާރިޖީ ސިޔާސަތު ބައްޓަން ކުރުމުގައި އަދި ހިންގުމުގައި އަބަދުވެސް އެންމެ އިސްކަން ދޭނީ ދިވެހި ރައްޔިތުންގެ މަސްލަޙަތު ޙިމާޔަތްކުރުމަށްކަމަށާއި، މިނިވަންކަމަށާއި، ސަލާމަތާ ތައްކާތެރިކަމަށާއި، ކުރިއެރުމާއި ކާމިޔާބީއަށްކަމުގައި ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ދިވެހިރާއްޖެއަށް އދ. ގެ މެންބަރުކަން ލިބުނުތާ 59 އަހަރު ފުރޭދުވަސް ފާހަގަކުރުމުގެ ގޮތުން ދެއްވި މެސެޖުގައެވެ.

ރައީސުލްޖުމްހޫރިއްޔާގެ މެސެޖުގައި އެމަނިކުފާނު ވަނީ އދ ގެ މެންބަރު ޤައުމެއްގެ ގޮތުގައި އޮވެ ރާއްޖެ ތަމްސީލުކުރުމުގެ މުހިންމުކަމުގެ މައްޗަށް އަލިއަޅުވާލައްވާފައެވެ. އެގޮތުން ޤައުމެއްގެ މިނިވަންކަން، ބައިނަލްއަޤްވާމީ މަސްރަހުގައި ދިފާއުކޮށް، ކުރިއެރުވޭނީ، އެ މިނިވަންކަން ލިބިއްޖެކަން އެހެން ގައުމުތަކަށް އަންގައިދީގެންކަމުގައި އެމަނިކުފާނު ވިދާޅުވިއެވެ. އަދި އެކަން ކުރުމަށް އދ ގެ މަޖިލީހަކީ އެންމެ އެކަށީގެންވާ އެއްތަން ކަމުގައި ފާހަގަކުރައްވާ ރައީސް ވިދާޅުވީ "ދިވެހިރާއްޖޭގެ މިނިވަންކަމާއި ސިޔާދަތު ދިފާއު ކޮށް، ކުރިއެރުވުމުގެ މަތިވެރި މަސައްކަތް ކުރާ އެންމެ މުހިންމު މައިދާނަކީ އދ. ޖަމުއިއްޔާ" ކަމުގައެވެ.

ރައީސްގެ މެސެޖުގައި ދިވެހިރާއްޖެއަކީ، ބައިނަލްއަޤްވާމީ މައިދާނުގައި އިޙްތިރާމު ކުރާ، އިޙުތިރާމު ލިބޭ، ބަޔަކަށްވާންޖެހޭކަމުގައި ފާހަގަކުރައްވާފައިވެއެވެ. އެގޮތުން މާދަމާ އޮންނަ އދ ގެ ބައްދަލުކުރެއްވުމުގައި އެމަނިކުފާނު އެންމެ އިސްކަމެއް ދެއްވާނީ ދިވެހިރާއްޖެއާ މެދު އެމަނިކުފާނު ދެކިވަޑައިގަންނަވާ ތަސައްވަރު ހާމަކުރުމަށްކަމުގައި އެމަނިކުފާނު ވިދާޅުވިއެވެ.

"އަޅުގަނޑު އދ. އަށް ޒިޔާރަތް ކޮށް، އެންމެ އިސްކަން ދޭނެކަމަކީ. ދިވެހިރާއްޖެއާ މެދު އަޅުގަނޑު ދެކޭ ތަސައްވުރު ހާމަކުރުން. ދިވެހިންގެ އަޑު، ދިވެހިންގެ ވިންދު ގެ އަޑު، ދިވެހިންގެ އިހުސާސްތައް އިއްވުމަށް" ރައީސް ވިދާޅުވިއެވެ.

ރައީސް މެސެޖުގައި އެމަނިކުފާނު ވަނީ އދ ގައި ރާއްޖެ އަދާކޮށްފައިވާ މުހިންމު ދައުރަށް އަލިއަޅުވާލައްވާފައެވެ. އަދި ކުރިއަށް އޮތްތަނުގައިވެސް އިތުރު މުހިންމު މަސްޢޫލިއްޔަތުތައް ޒިންމާދާރުކަމާއެކު އަދާކުރުމަށް ޤައުމު ކުރިއަށްދާނެކަމުގައި އެމަނިކުފާނު ވިދާޅުވިއެވެ.