ދައުލަތުގެ ބައެއް މުވައްސަސާތަކުގެ ވެރިންގެ މުސާރަ ކުޑަކުރުމަށް ރައީސް ނިންމަވައިފި

ސަރުކާރުގެ ސިޔާސީ ބައެއް މުވައްޒަފުންނާއި ދައުލަތުގެ ބައެއް އިސްވެރިންގެ އިތުރުން ކުންފުނިތަކުގެ ވެރިންގެ މުސާރައިން ދިހަ އިންސައްތަ ކުޑަކުރަން ރައީސް ޑރ މުހައްމަދު މުއިއްޒު ނިންމަވައިފި އެވެ. އެމަނިކުފާނުގެ ރަސްމީ އެކައުންޓުން މިރޭ ޙިއްޞާކުރެއްވި ޕޯސްޓުގައި މުސާރަ ކުޑަކުރެއްވި މުވައްސަސާތަކުގެ ތަފްސީލީ މަޢުލޫމާތު ބަޔާންކޮށްފައިވެއެވެ.

އެގޮތުން މުސާރައަށް ބަދަލުތަކެއް އަންނަ ފަރާތްތަކަކީ;

1.ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން %10 އުނިކުރުން.‏2.ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިން %10 އުނިކުރުން. އަދި ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ކަނޑައެޅުން. (މިހާރު 100،000ރ އަށްވުރެ ބޮޑު މުސާރަ ބައެއް ކުންފުނި ތަކުގެ މުސާރަ އޮނިގަނޑު އޮތްގޮތުން ލިބޭ)‏3.މިނިވަން މުައައްސަސާތަކުގެ އިސްވެރިންގެ މުސާރައިން %10 އުނިކުރުމަށް ކަމާބެހޭ ފަރާތްތަކަށް ހުށަހެޅުން.‏4.ޝަރުޢީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން %10 އުނިކުރުމަށް އެ ފަރާތްތަކުގައި އެދުން.‏މީގެ ތެރެއިންވެސް މަތީގައިވާ ފިޔަވަޅުތައް އެޅުމުގައި 12،000 ރުފިޔާއިން ދަށުން މުސާރަ ލިބޭ ފަރާތްތައް އިސްތިސްނާކުރައްވާނެކަމުގައި ރައީސްގެ ޕޯސްޓުގައި ބަޔާންކޮށްފައިވެއެވެ. އަދި ރައީސްގެ މުސާރައިގެ %50 ނުނަގާ ގޮތަށް ހަމަޖައްސަން ދަންނަވާފައިވާނެކަމުގައިވެސް ބަޔާންކޮށްފައިވެއެވެ.

ރައީސްގެ މި ނިންމެވުމަކީ 2025 ވަނަ އަހަރަށް ދައުލަތުގެ ބަޖެޓު ހުށަހަޅާއިރު، އިޤްތިޞާދީ އިޞްލާޙީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަޤްޞަދުގައި ނިންމެވި ނިންމެވުމެކެވެ. އަދި މަތީގައި ބަޔާންކޮށްފައިވާ ފޮޔަވަޅުތައް އެޅުަމަށް ނިންމަވާފައިވަނީ ކުރިއަށްއޮތް 2 އަހަރުގެ މުއްދަތަށެވެ.