މުޖުތަމަޢުގެ ހަމަޖެހުމަށްޓަކައި ޑްރަގްގެ ގާނޫނު އިސްލާހުކޮށް މި ހަފުތާގައި ހުށަހަޅައި ގޭންގް ކުށްތައް ހުއްޓުވަން އާ ބިލެއް މަޖިލީހަށް ހުށަހަޅުއްވަނީ

މުޖުތަމަޢުގެ ހަމަޖެހުމާ ސަލާމަތާ އެންމެންގެ ރައްކާތެރިކަމަށްޓަކައި ޑްރަގްގެ ގާނޫނު އިސްލާހުކޮށް މި ހަފުތާގައި ހުށަހަޅުއްވާނެ ކަމަށާއި ގޭންގް ކުށްތައް ހުއްޓުވަން އާ ބިލެއް މަޖިލީހަށް ކުރިއަށް އޮތް ދެ ހަފުތާ ތެރޭގައި ހުށަހަޅުއްވާނެކަމުގައި ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު އެކްސްގައި ކުރެއްވި ޕޯސްޓެއްގައެވެ.

ރައީސްގެ ޕޯސްޓުގައި މަސްތުވާތަކެތީގެ ވަބާއިން ދިވެހި ޤައުމު ސަލާމަތްކުރުމަށް ދައުލަތުގެ އިދާރާތަކުން ކުރަމުން އަންނަ މަސައްކަތަށް އޮތް އެންމެ ބޮޑު އެއް ގޮންޖެހުމަކީ މިހާރު އަމަލުކުރަމުންދާ މަސްތުވާތަކެއްޗާބެހޭ ޤާނޫނުގައި ހުރި ބައެއް އުނިކަންކަން ކަމުގައި ފާހަގަކުރައްވާފައިވެއެވެ. އަދި އެމަނިކުފާނުގެ ޕޯސްޓުގައި މަސްތުވާތަކެތީގެ މައްސަލަތައް ތަޙްޤީޤުކޮށް، ދަޢުވާކުރުމުގައި ހުރި ގޮންޖެހުންތައް ނައްތާލުމަށްޓަކައި، ދައުލަތުގެ ކަމާގުޅުންހުރި އިދާރާތަކުގެ މަޝްވަރާއާއެކު މަސްތުވާތަކެއްޗާބެހޭ ޤާނޫނު މުރާޖަޢާކުރުމަށްފަހު، އެ ޤާނޫނަށް ގެންނަންޖެހޭ އިޞްލާޙުތައް މި ހަފުތާގެ ތެރޭގައި ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅުއްވާނެކަމުގައި ބަޔާންކުރައްވާފައިވެއެވެ.

ރައީސް މިއަދު ޙިއްޞާކުރެއްވި ޕޯސްޓުގައި މަސްތުވާތަކެތީގެ މައްސަލަތަކާ ވަރަށް ބޮޑަށް ގުޅިފައިވާ ގޭންގު ކުށްތަކުގެ މައްސަލައިން ދިވެހި ޤައުމު ރައްކާތެރިކޮށް ސަލާމަތްކުރުމަށްޓަކައި، މިހާރު އަމަލު ކުރަމުން އަންނަ ގޭންގު ކުށްތައް މަނާކުރުމުގެ ޤާނޫނުގެ ބަދަލުގައި، މި ސަރުކާރުގެ ފަރާތުން އަލަށް އެކުލަވާލަމުންދާ ގޭންގު ހަދައިގެން ކުރާ ކުށްތައް މަނާކުރުމުގެ ބިލު ހުށަހަޅުއްވާނެކަމުގައިވެސް ބަޔާންކުރައްވާފައިވެއެވެ. އަދި އެ ބިލު ކުރިޔަށް އޮތް 2 ހަފްތާ ތެރޭގައި ސަރުކާރުގެ ފަރާތުން މަޖިލީހަށް ހުށަހަޅުއްވާނެ ކަމުގައިވެސް އެމަނިކުފާނުގެ ޕޯސްޓުގައި ބަޔާންކުރައްވާފައިވެއެވެ.

ރައީސްގެ މެސެޖު ނިންމަވާލައްވާފައިވަނީ މަސްތުވާތަކެތީގެ މައްސަލަތަކާ ގޭންގު ކުށްތަކުގެ މައްސަލަފަދަ ބޮޑެތި މައްސަލަތަކަށް ދާއިމީ ޙައްލެއް ގެނައުމަށް ކުރަމުންދާ މަސައްކަތްތަކަށް ދިވެހި ލޮބުވެތި ރައްޔިތުން ދެއްވާ އެއްބާރުލެއްވުމަށް ޝުކުރު ދަންނަވަމުންނެވެ.